فرمان الہی
نماز کے اوقات
اسکواش کے لیجنڈ پلیئر جہانگیر خان نے انکشاف کیا ہے کہ میرا اسکواش کھیلنا ایک معجزہ تھا۔
دنیا کے عظیم ترین اسکواش کھلاڑی اور پاکستان کے فخر جہانگیر خان نے حال ہی میں ایک پروگرام میں شرکت کی، جہاں انہوں نے اپنی کامیابی کی کہانی سناتے ہوئے ایک ایسا معجزہ بیان کیا جس نے سامعین کے دلوں کو چھو لیا۔
جہانگیر خان نے مسلسل 555 میچز جیتنے کا ناقابلِ شکست عالمی ریکارڈ قائم کیا، انہوں نے بتایا کہ ان کا سفر اسکواش میں کسی خواب سے کم نہیں۔
انہوں نے کہا میری پیدائش کے وقت ہی ڈاکٹروں نے میرے والد سے کہہ دیا تھا کہ یہ بچہ آپ کے خاندان کے دوسرے مردوں کی طرح اسکواش نہیں کھیل سکے گا، کیونکہ میں ہرنیہ کے مسئلے کے ساتھ پیدا ہوا تھا۔
ان کا کہنا ہے کہ 5 اور 12 سال کی عمر میں میری دو بڑی سرجری ہوئیں اور دوسری سرجری کے بعد ڈاکٹرز نے والدین کو واضح الفاظ میں کہہ دیا کہ اس بچے کا اسکواش سے کوئی تعلق نہیں ہو سکتا۔
جہانگیر خان نے کہا کہ میری ماں میری سب سے بڑی طاقت تھیں، میرے والدین نے کبھی ہار نہیں مانی اور میں نے بھی ہمت نہیں چھوڑی، 16 سال کی عمر سے پہلے ہی میں نے اپنی محنت شروع کردی اور ایک کے بعد ایک چیمپئن شپ جیتتا گیا۔
انہوں نے بتایا کہ میرے وہی ڈاکٹر جنہوں نے کبھی میرے کھیلنے کے خواب کو رد کردیا تھا بعد میں میرے میچز باقاعدگی سے دیکھتے تھے اور ہر بار حیران ہوتے تھے۔
